Col 2 | NdeIBE | STEP | Ngifuna ukuba likwazi ukuthi ngilizamela kakhulu okunganani lina labaseLawodikheya, kanye labo bonke abangakangiboni mathupha.

Colossians 2

1 Ngifuna ukuba likwazi ukuthi ngilizamela kakhulu okunganani lina labaseLawodikheya, kanye labo bonke abangakangiboni mathupha. 2 Injongo yami yikuthi bakhuthazeke ezinhliziyweni njalo bamanyane ethandweni, ukuze babe lenotho egcweleyo yokuqedisisa okupheleleyo, ukuze bayazi imfihlakalo kaNkulunkulu, okutsho uKhristu, 3 okufihlwe kuye yonke ingcebo yokuhlakanipha lokwazi.

4 Ngilitshela lokhu ukuze kungabi khona olikhohlisayo ngamazwi amnandi. 5 Ngoba lanxa ngingekho kini ngomzimba, ngikhona ngilani ngomoya njalo ngithokoza ukubona ubunono benu lokuqina kokholo lwenu kuKhristu.

Ukukhululeka Emithethweni Yabantu Ngokuphila LoKhristu

6 Ngakho-ke, njengoba uKhristu Jesu lamamukela njengeNkosi, qhubekani lihlala kuye,

7 ligxile njalo lakhelwe kuye, liqinile ekukholweni njengokufundiswa kwenu, liphuphuma ngokubonga.

8 Qaphelani kungabi khona olithumbayo ngenhlakanipho eyize lekhohlisayo, eyeyame emdabukweni wabantu lakuzimiso zemvelo yakulo umhlaba kungesikho kuKhristu.

9 Ngoba konke ukuphelela kobuNkulunkulu kuhlezi kuKhristu ngesimo somzimba, 10 njalo lina lilakho lokhukuphelela kuKhristu oyinhloko yamandla wonke kanye lokubusa konke.

11 Lasokelwa kuye, ngokususwa kwemvelo yenu yesono, kungayisikho ngokusoka okwenziwa ngezandla zabantu kodwa ngokusoka okwenziwa nguKhristu, 12 selimbelwe laye ngobhaphathizo lavuswa kanye laye ngokukholwa kwenu emandleni kaNkulunkulu, owamvusayo kwabafileyo.

13 Lapho lalifile ezonweni zenu lasekungasokanga kwemvelo yenu yesono, uNkulunkulu walenza laba ngabaphilayo kanye loKhristu. Wasithethelela zonke izono zethu, 14 eseyesule yonke imithetho elotshiweyo, lezimiso zayo, eyayimelane lathi njalo isivimbela; wayisusa, wayibethela esiphambanweni. 15 Kwathi eselahlise imibuso lababusi izikhali, wenza umbukiso oyinhlekisa ngabo, wabanqoba ngesiphambano.

16 Ngakho lingavumeli umuntu elahlulela ngalokho elikudlayo loba elikunathayo, loba ngokuphathelane lomkhosi wokholo, ukuthokozela ukuthwasa kwenyanga loba usuku lweSabatha. 17 Lezizinto ziyisithunzi nje sezinto ezazizakuza; kodwa ubuqotho bufunyanwa kuKhristu. 18 Lingavumeli muntu othokoziswa yikuzithoba kwamanga lokukhonza izingilosi eliphuthisa umvuzo wenu. Umuntu onjalo ubalisa ngokupheleleyo konke akubonileyo, kuthi ingqondo yakhe engayisiyo yomoya imkhukhumeze ngemicabango eyize.

19 Uselahlekelwe yiNhloko, lapho umzimba wonke, usekelwe waxhunyelelwa ndawonye yimisipha lezinsinga, okhula khona ukhuliswa nguNkulunkulu.

20 Njengoba lafa loKhristu ezimisweni zalo umhlaba eziyisisusa, kungani, ngokungathi lilokhu lingabawo, lizibeka ngaphansi kwemithetho yawo yokuthi: 21 “Ungabambi! Unganambithi! Ungathinti!”? 22 Konke lokhu kumiselwe ukuqedwa yikusetshenziswa, ngoba kweyame phezu kwemilayo yabantu lemfundiso yabo. 23 Impela izimiso ezinje zibonakala njengenhlakanipho, ngenkonzo yazo yokuzenzela, ukuzithoba kwamanga lokuphatha umzimba kabuhlungu, kodwa kazilalo usizo lokuzithiba ezinkanukweni zomzimba.